തിക്കോടി: തൃക്കോട്ടൂർ ശ്രീ പെരുമാൾപുരം മഹാശിവക്ഷേത്രത്തിലെ ഈ വർഷത്തെ ആറാട്ട് മഹോത്സവം മാർച്ച് 29-ന് ആരംഭിക്കും. ഭക്തിനിർഭരമായ ചടങ്ങുകളോടെയും വൈവിധ്യമാർന്ന കലാപരിപാടികളോടെയുമാണ് ഇത്തവണത്തെ ഉത്സവം ആഘോഷിക്കുന്നത്. ഉത്സവത്തിന്റെ പ്രധാന ചടങ്ങായ കൊടിയേറ്റം മാർച്ച് 30-ന് വൈകുന്നേരം ക്ഷേത്രം തന്ത്രിയുടെ മുഖ്യകാർമ്മികത്വത്തിൽ നടക്കും. അന്നേദിവസം രാത്രി 8 മണിക്ക് കലാനിലയം ഹരിയും സംഘവും അവതരിപ്പിക്കുന്ന സോപാന സംഗീതവും തുടർന്ന് പ്രാദേശിക കലാപ്രതിഭകളുടെ നൃത്തനിത്യങ്ങളും അരങ്ങേറും.

മാർച്ച് 31-ന് വൈകുന്നേരം തിരുവാഭരണ ഘോഷയാത്ര നടക്കും. 6.30-ന് ക്ഷേത്ര വിദ്യാപീഠം വിദ്യാർത്ഥികളുടെ പഞ്ചാരിമേളവും തുടർന്ന് തിരുവാതിരക്കളി, കൈകൊട്ടിക്കളി എന്നിവയും ഉണ്ടായിരിക്കും. രാത്രി 9.30-ന് വിദ്യാപീഠം വിദ്യാർത്ഥികളുടെ നൃത്ത അരങ്ങേറ്റം നടക്കും. ഏപ്രിൽ 1-ന് വൈകുന്നേരം 4 മണിക്ക് അക്ഷരശ്ലോക സദസ്സും 7 മണിക്ക് പ്രഭാഷണവും നടക്കും. തുടർന്ന് മിഥില ഭജൻസ് മീറ്റും പെരുമാൾപുരം അമ്മ ഇൻസ്റ്റിറ്റ്യൂട്ട് അവതരിപ്പിക്കുന്ന നൃത്ത പരിപാടികളും അരങ്ങേറും.

ഏപ്രിൽ 2-നാണ് ഉത്സവബലിയും പ്രസാദ ഊട്ടും നടക്കുക. വൈകുന്നേരം 4 മണിക്ക് ചാക്യാർകൂത്തും 7 മണിക്ക് ഗ്രാമപ്രദക്ഷിണവും നടക്കും. രാത്രി 9.30-ന് നാദവേദി പെരുമാൾപുരം അവതരിപ്പിക്കുന്ന കരോക്കെ ഗാനമേളയും 10 മണിക്ക് തിരുവനന്തപുരം സംഘകേളിയുടെ ‘ലക്ഷ്മണരേഖ’ എന്ന നാടകവും അരങ്ങേറും. ഏപ്രിൽ 3-ന് വൈകുന്നേരം 4 മണിക്ക് വിവിധ ഭാഗങ്ങളിൽ നിന്നുള്ള വരവ് ആഘോഷങ്ങൾ ക്ഷേത്രത്തിലെത്തും. രാത്രി 8 മണിക്ക് പള്ളിവേട്ടയും 10 മണിക്ക് വർണ്ണാഭമായ വെടിക്കെട്ടും നടക്കും. ഏപ്രിൽ 4-ന് രാവിലെ ആറാട്ടോടുകൂടി ഉത്സവത്തിന് സമാപനമാകും. കൊടിയിറക്കവും തുലാഭാരവും അന്നേദിവസം നടക്കുമെന്ന് ക്ഷേത്ര ഭാരവാഹികൾ അറിയിച്ചു.