റിപ്പബ്ലിക് ദിനത്തിൽ തന്റെ പൂർണ സ്വാതന്ത്ര്യവും ഉപയോഗിച്ച് മുകളിലേക്ക് കുതിച്ച് സ്വർണം. ഇന്നലെ ഞായറാഴ്ച ആയതിനാൽ ഒരു ദിവസത്തെ വിശ്രമത്തിന് ശേഷമാണ് സ്വർണം വീണ്ടും ഓടിത്തുടങ്ങിയത്. ഇന്നലെ ഒരു പവൻ സ്വർണത്തിന് 1,17,520 രൂപയായിരുന്നെങ്കിൽ ഇന്നത് 1,19,320 രൂപയായി. 1800 രൂപയാണ് ഒറ്റയടിക്ക് വർധിച്ചത്.
14,915 രൂപയാണ് നിലവിൽ ഒരുഗ്രാം സ്വർണത്തിന്റെ വില. കഴിഞ്ഞ ദിവസത്തെ വിലയിൽ നിന്നും 225 രൂപയുടെ വർധനവാണ് ഗ്രാമിനുണ്ടായത്. ഈ മാസത്തെ ഏറ്റവും ഉയർന്ന വിലയിലാണ് നിലവിൽ സ്വർണം നിൽക്കുന്നത്.
സ്വർണവിലയിൽ ഉണ്ടാകുന്ന കുതിപ്പ് വിവാഹ പാർട്ടിക്കാർ അടക്കമുള്ള ഉപഭോക്താക്കളെ ചില്ലറയൊന്നുമല്ല വലക്കുന്നത്. ഒരു പവന്റെ ആഭരണം വാങ്ങണമെങ്കിൽ പണിക്കൂലിയടക്കം ഒന്നേകാൽ ലക്ഷത്തിലേറെ രൂപ ചെലവാക്കേണ്ട അവസ്ഥയാണ്. ഒരേ ദിവസം തന്നെ വിലയിൽ പലതവണ മാറ്റം വരുന്നതും ഉപഭോക്താക്കളെ ആശയക്കുഴപ്പത്തിലാക്കുന്നുണ്ട്. ഇന്ന് തന്നെ വീണ്ടും വില ഉയരുമോ എന്ന ആശങ്കയും നിലനിൽക്കുന്നുണ്ട്. അതേസമയം നിക്ഷേപകർക്ക് വൻനേട്ടമാണ് വില ഉയരുമ്പോൾ ഉണ്ടാകുന്നത്
