ആലപ്പുഴ: ഓമനപ്പുഴയി​ൽ മകളെ കൊലപ്പെടുത്തിയത് രാത്രി വീട്ടിൽ വൈകിയെത്തുന്നതിനെ ചൊല്ലിയുള്ള തർക്കത്തെ ​തുടർന്നെന്ന് പിതാവിന്റെ മൊഴി. മാരാരിക്കുളം തെക്ക്​ പഞ്ചായത്ത്​ 15ാം വാർഡ്​​ കുടിയാംശേരി വീട്ടിൽ എയ്​ഞ്ചൽ ജാസ്മിനാണ്​ (28) മരിച്ചത്​. പിതാവ്​ കഴുത്തിൽ തോർത്ത്​ മുറുക്കി​ കൊലപ്പെടുത്തുകയായിരുന്നെന്ന്​ പൊലീസ് പറഞ്ഞു​. സംഭവത്തിൽ പിതാവ്​​ ജോസ്​മോനെ (ഫ്രാൻസിസ് -​53) മണ്ണഞ്ചേരി പൊലീസ്​ അറസ്റ്റ്​ ചെയ്തു. പെൺകുട്ടിയുടെ നിരന്തരമുള്ള ഉപദ്രവം സഹിക്കവയ്യാതെ ചൊവ്വാഴ്ച രാത്രി മകളുടെ കഴുത്ത്​ ഞെരിച്ചും പിന്നീട്​ തോർത്ത്​ മുറുക്കിയും കൊലപ്പെടുത്തിയെന്ന്​​ ചോദ്യംചെയ്യലിൽ പിതാവ്​ സമ്മതിച്ചതായി പൊലീസ്​ പറഞ്ഞു.

ചൊവ്വാഴ്ച രാത്രി 10.30നാണ്​ സംഭവങ്ങൾക്ക്​ തുടക്കം. രാത്രി വൈകി വീട്ടിൽ എത്തുന്നത് ചോദ്യം ചെയ്തിരുന്നു. വീടിന്​ പുറത്തിറങ്ങിയ യുവതിയോട്​ അകത്തുകയറാൻ പറഞ്ഞത്​ ഇഷ്ടപ്പെട്ടില്ല. വീട്ടിലുണ്ടായിരുന്ന പ്രായമായ അപ്പൂപ്പനെ ചവിട്ടുകയും ഉപദ്രവിക്കുകയും​ ചെയ്തത്​ ചോദ്യംചെയ്​ത ജോസ്​മോനുമായി വഴക്കുണ്ടാക്കി. തുടർന്നാണ്​ ക്രൂരമായ കൊലപാതകം നടന്നത്​. ഈ സമയം വീട്ടിൽ ജോസ്​മോനും അപ്പൂപ്പനും അമ്മൂമ്മയും ഭാര്യയുമാണ്​ ഉണ്ടായിരുന്നത്​. നിസാര കാര്യത്തിനുപോലും വീട്ടിലുള്ളവരെ നിരന്തരം ഉപദ്രവിക്കുമായിരുന്നു. ഇതിൽ സഹികെട്ടാണ്​ ​മകളെ കൊന്നതെന്നാണ്​ പ്രാഥമികവിവരം.

ബുധനാഴ്ച രാവിലെ ആറിന്​ കിടപ്പുമുറിയിലെ കട്ടിലിലാണ്​ മൃതദേഹം ക​ണ്ടെത്തിയത്​. മകൾ ആത്മഹത്യ ചെയ്​തെന്നാണ്​ അയൽവാസികളെയും ബന്ധുക്കളെയും ആദ്യം അറിയിച്ചത്​. തുടർന്ന്​ ബന്ധുക്കളടക്കം വീട്ടിലെത്തി പരിശോധിച്ചപ്പോൾ കട്ടിലിലെ തലയിണയിൽനിന്ന്​ അൽപം മാറിയാണ്​ മൃതദേഹം കിടന്നത്​. ​തുടർന്ന്​ ചെട്ടികാട്​ സ്വകാര്യ ആശുപത്രിയിൽ എത്തിച്ചെങ്കിലും മരണം സ്ഥിരീകരിച്ചു. മരണവിവരം വാർഡ്​ അംഗം ഇമ്മാനുവലാണ്​ പൊലീസിനെ അറിയിച്ചത്​. സ്ഥലത്തെത്തിയ മണ്ണ​ഞ്ചേരി പൊലീസ്​ ഇൻക്വസ്റ്റ്​ നടത്തിയപ്പോൾ യുവതിയുടെ കഴുത്തിൽ ചെറിയ പാടുകൾ ശ്രദ്ധയിൽ​പെട്ടു. ഇത്​​ സംശയത്തിന്​ ഇടയാക്കി. ഇതിനുപിന്നാലെ പിതാവിനെയും ബന്ധുക്കളെയും സ്​റ്റേഷനിൽ വിളിച്ചുവരുത്തി വിശദമായി ചോദ്യംചെയ്തപ്പോഴാണ്​ കൊലപാതക വിവരം പുറത്തറിഞ്ഞത്​. ആത്മഹത്യയെന്ന നിഗമനത്തിൽ മൃതദേഹം മറവുചെയ്യാൻ നടപടികൾ പുരോഗമിക്കുന്നതിനിടെയാണ്​ വിവരം നാട്ടുകാരും അയൽവാസികളും അറിയുന്നത്​.

ആലപ്പുഴ പ്രൊവിഡൻസ്​ ആശുപ​ത്രി ലാബ്​ ടെക്നീഷ്യനാണ് എയ്​ഞ്ചൽ. രണ്ടുവർഷം മുമ്പ്​ തുമ്പോളി സ്വദേശിയുമായിട്ടായിരുന്നു വിവാഹം. എട്ടുമാസമായി ഭർത്താവുമായി പിണങ്ങി സ്വന്തം വീട്ടിൽ കഴിയുകയായിരുന്നു. ഇതുമായി ബന്ധപ്പെട്ട്​ വീട്ടിൽ തർക്കവും ബഹളവും പതിവാണ്​. ഓട്ടോഡ്രൈവർ കൂടിയായ ജോസ്​മോന്‍റെ രണ്ടാമത്തെ മകളാണ്​. മൂത്തമകൾ ബെയ്​സിയെ നേരത്തേ വിവാഹം കഴിച്ച്​ അയച്ചിരുന്നു. മാതാവ്​: സിന്ധു.

ആലപ്പുഴ വണ്ടാനം ​മെഡിക്കൽകോളജ്​ ആശുപത്രിയിൽ പോസ്​​റ്റ്​മോർട്ടത്തിനുശേഷം മൃതദേഹം ബന്ധുക്കൾക്ക്​ വിട്ടുനൽകി. സംസ്​കാരം വ്യാഴാഴ്ച രാവിലെ 10ന്​ ഓമനപ്പുഴ സെന്‍റ്​ ​ഫ്രാൻസിസ്​ ​​സേവ്യർ പള്ളി സെമിത്തേരിയിൽ.