ഗൂഗ്ള്‍ ക്രോമില്‍ ഇപ്പോള്‍ പാസ്‌പോർട്ട്, ഡ്രൈവിങ് ലൈസൻസ്, വാഹന രജിസ്‌ട്രേഷൻ തുടങ്ങിയ സുപ്രധാന രേഖകളുടെ വിവരങ്ങള്‍ ഓട്ടോഫില്‍ ചെയ്യാൻ കഴിയുന്ന പുതിയ ഫീച്ചർ അവതരിപ്പിച്ചു.
വെബ്‌സൈറ്റുകളില്‍ ഫോമുകള്‍ പൂരിപ്പിക്കുമ്ബോള്‍ ഉപയോക്താക്കളുടെ സമയം ലാഭിക്കാനാണ് ക്രോം ഓട്ടോഫില്‍ ഫീച്ചർ രൂപകല്‍പ്പന ചെയ്‌തിരിക്കുന്നത്. ഇതുവരെ പേര്, വിലാസം എന്നിവയായിരുന്നു ഓട്ടോഫില്‍ ചെയ്യാൻ കഴിഞ്ഞിരുന്നത്. എന്നാല്‍ ഇപ്പോള്‍ പാസ്‌പോർട്ട്, ഡ്രൈവിങ് ലൈസൻസ്, വാഹന രജിസ്‌ട്രേഷൻ തുടങ്ങിയ സർക്കാർ നല്‍കുന്ന തിരിച്ചറിയല്‍ രേഖകളുടെ വിവരങ്ങളും സുരക്ഷിതമായി സേവ് ചെയ്യാനും ആവശ്യമുള്ളപ്പോള്‍ ഓട്ടോമാറ്റിക്കായി പൂരിപ്പിക്കാനും സാധിക്കും.
നിങ്ങള്‍ അനുമതി നല്‍കുമ്ബോള്‍ മാത്രമേ ക്രോം ഓട്ടോഫില്‍ ഡാറ്റ സംരക്ഷിക്കുകയുള്ളൂവെന്നും ബ്രൗസർ ഈ വിവരങ്ങള്‍ എൻക്രിപ്ഷൻ വഴി സംരക്ഷിക്കുമെന്നും ഗൂഗ്ള്‍ വ്യക്തമാക്കി. ഓട്ടോഫില്‍ ചെയ്യുന്നതിന് മുമ്ബ് ഉപയോക്താവിന്‍റെ പാസ്‌വേഡോ മറ്റ് സുരക്ഷാ പരിശോധനകളോ ആവശ്യപ്പെടും.
ക്രോമിന്‍റെ സെറ്റിങ്സിലെ ‘പേയ്മെന്‍റ് മെത്തേഡ്സ് ആൻഡ് അഡ്രസസ്’ എന്ന ഭാഗത്ത് ഇതിനായുള്ള പുതിയ വിഭാഗം ഉണ്ടാകും. അവിടെ ഉപയോക്താക്കള്‍ക്ക് അവരുടെ രേഖകളുടെ വിവരങ്ങള്‍ ചേർക്കാൻ കഴിയും. യാത്രകള്‍ക്കും സർക്കാർ സേവനങ്ങള്‍ക്കും വേണ്ടിയുള്ള അപേക്ഷകള്‍ക്ക് ഈ നീക്കം ഓണ്‍‌ലൈൻ ഫോമുകള്‍ പൂരിപ്പിക്കുന്നത് കൂടുതല്‍ വേഗവും സൗകര്യപ്രദവുമാക്കും.
എ.ഐ ബ്രൗസറുകളുടെ എണ്ണം വർധിച്ചുവരുന്ന സാഹചര്യത്തിലാണ് പുതിയ പ്രഖ്യാപനം. ആഴ്ചകള്‍ക്ക് മുമ്ബ്, ഗൂഗ്ള്‍ എ.ഐ പ്രോ, ഗൂഗ്ള്‍ എ.ഐ അള്‍ട്രാ സബ്‌സ്‌ക്രൈബർമാർക്ക് മാത്രമായി പരിമിതപ്പെടുത്തിയിരുന്ന ജെമിനി ഇൻ ക്രോം യു.എസിലെ എല്ലാ മാക്, വിൻഡോസ് ഡെസ്‌ക്‌ടോപ്പ് ഉപയോക്താക്കള്‍ക്കും ലഭ്യമാക്കിയിരുന്നു. ഭാവിയില്‍ ക്രോമിലേക്ക് ഏജന്റ് കഴിവുകള്‍ കൊണ്ടുവരാനും, എ.ഐ മോഡ് സെർച്ചിങ് ഫീച്ചർ അഡ്രസ് ബാറില്‍ ചേർക്കാനും, ഓട്ടോമാറ്റിക് പാസ്‌വേഡ് റീസെറ്റുകള്‍ പുറത്തിറക്കാനും മറ്റും പദ്ധതിയിടുന്നതായും കമ്ബനി വ്യക്തമാക്കിയിരുന്നു
