സംസ്ഥാനത്ത് കഴിഞ്ഞ ദിവസങ്ങളിൽ തുടർച്ചയായി വർധിച്ചുവന്ന വൈദ്യുതി ഉപഭോഗത്തിൽ ഞായറാഴ്ച നേരിയ കുറവ് രേഖപ്പെടുത്തി. അവധി ദിനമായതും സംസ്ഥാനത്തിന്റെ വിവിധ ഭാഗങ്ങളിൽ ലഭിച്ച വേനൽ മഴയുമാണ് വൈദ്യുതി ഉപയോഗം കുറയാൻ കാരണമായത്. 106.03 ദശലക്ഷം യൂണിറ്റാണ് ഇന്നലത്തെ ആകെ ഉപഭോഗമായി കണക്കാക്കുന്നത്. വൈകുന്നേരത്തെ ഉയർന്ന വൈദ്യുതി ആവശ്യകതയിലും (പീക്ക് ഡിമാൻഡ്) കുറവുണ്ടായിട്ടുണ്ട്. 5600 മെഗാവാട്ടായിരുന്നു ഇന്നലത്തെ ഉയർന്ന ആവശ്യകത. ആകെ ഉപയോഗിച്ചതിൽ 19.55 ദശലക്ഷം യൂണിറ്റ് ആഭ്യന്തര ജലവൈദ്യുത പദ്ധതികളിൽ നിന്ന് ഉത്പാദിപ്പിച്ചപ്പോൾ 84.37 ദശലക്ഷം യൂണിറ്റാണ് പുറത്ത് നിന്ന് വാങ്ങിയത്. ചരിത്രത്തിലെ ഏറ്റവും ഉയർന്ന വൈദ്യുതി ഉപയോഗവും ആവശ്യകതയും രേഖപ്പെടുത്തിയ ശനിയാഴ്ചയ്ക്ക് പിന്നാലെയാണ് ഉപഭോഗം താഴോട്ട് വന്നത് എന്നത് ശ്രദ്ധേയമാണ്. 117.16 ദശലക്ഷം യൂണിറ്റായിരുന്നു ശനിയാഴ്ചത്തെ റെക്കോർഡ് ഉപഭോഗം. വരും ദിവസങ്ങളിലും മഴ തുടർന്നാൽ വൈദ്യുതി പ്രതിസന്ധിക്ക് നേരിയ ആശ്വാസം ലഭിക്കുമെന്നാണ് കെഎസ്ഇബിയുടെ കണക്കുകൂട്ടൽ.